პროექტის "საქართველოს 'რკინის გზით' წარსულიდან მომავლისაკენ" - დასკვნითი ღონისძიება

   ა(ა)იპ სარკინიგზო ტრანსპორტის კოლეჯმა წარმატებით განახორციელა ა(ა)იპ პროფესიული უნარების სააგენტოს მიერ გამოცხადებული ექსტრაკურიკულური აქტივობების დანერგვისა და განვითარების კონკურსში გამარჯვებული პროექტის - „საქართველოს „რკინის გზით" წარსულიდან მომავლისაკენ" მესამე დასკვნითი ეტაპი.

  2025 წლის 6 მაისს ახალქალაქის რკინიგზის სადგურში გაიმართა პროექტის შემაჯამებელი ღონისძიება, რომელზეც წარმოდგენილი იქნა პროექტის მიმდინარეობისას განხორციელებული აქტივობების მიზნები, შედეგები, სამომავლო პერსპექტივები.

  დასკვნით ღონისძიებას ესწრებოდნენ კოლეჯის ადმინისტრაცია, ა(ა)იპ  პროფესიული უნარების სააგენტოს, სს საქართველოს რკინიგზის, შპს მარაბდა-კარწახის რკინიგზის წარმომადგენლები, პროფესიული საგანმანათლებლო პროგრამების ხელმძღვანელები, პროექტის გუნდის წევრები და თამაზ მელიქიძის სახელობის ახალქალაქის მუნიციპალიტეტის სოფ. კოთელიის საჯარო სკოლის მოსწავლეები.

  ღონისძიების ცენტრალური ნაწილი გახდა სიმბოლური აქტივობა "დროის კაფსულა", რომელშიც ყველა დამსწრემ მიიღო მონაწილეობა. მათ სპეციალურ ბარათებზე დაწერეს თავიანთი ხედვა და სურვილები რკინიგზის მომავლის შესახებ. შევსებული ბარათები მოთავსდა კაფსულაში, რომელიც გაიხსნება 2035 წელს. 

  პროექტმა მნიშვნელოვანი წვლილი შეიტანა პროფესიული სტუდენტების ცოდნის გაღრმავებაში, გუნდური მუშაობის უნარების განვითარებაში, მოქალაქეობრივი თვითშეგნების ამაღლებასა და კულტურული მემკვიდრეობის დაფასებაში. თანამშრომლობამ პარტნიორ სკოლებთან ხელი შეუწყო პროფესიული განათლების პოპულარიზაციასა და სხვადასხვა რეგიონში მცხოვრები ახალგაზრდების დაახლოებას.

 ა(ა)იპ სარკინიგზო ტრანსპორტის კოლეჯი მადლობას უხდის ა(ა)იპ პროფესიული უნარების სააგენტოს ამ შესაძლებლობისთვის!